ഷാർജയിലെ അൽ നഹ്ദയിൽ മലയാളി യുവാവ് കുത്തേറ്റ് മരിച്ചു. കണ്ണൂർ സ്വദേശിയായ ഇസ്മായിൽ പൊന്നാരം ഇബ്രാഹിംകുട്ടി ആണ് മരിച്ചത്. ടിക്ടോക്കിനെ ചൊല്ലിയുണ്ടായ തർക്കമാണ് കൊലപാതകത്തിൽ കലാശിച്ചതെന്നാണ് പ്രാഥമിക വിവരം.
സംഭവത്തിൽ പ്രതിയെന്ന് സംശയിക്കുന്നയാളും മലയാളിയാണെന്നാണ് ഷാർജ പൊലീസിന് ലഭിച്ച വിവരം. ഇരുവരും ടിക്ടോക്കിലൂടെ പരസ്പരം വെല്ലുവിളിച്ചതിന് പിന്നാലെയാണ് സംഘർഷം രൂക്ഷമായതെന്നും തുടർന്ന് കുത്തേറ്റ് മരണം സംഭവിച്ചതായും വിവിധ മാധ്യമങ്ങൾ റിപ്പോർട്ട് ചെയ്യുന്നു.
സംഭവസ്ഥലത്തെത്തിയ ഷാർജ പൊലീസ് അന്വേഷണം ആരംഭിച്ചിട്ടുണ്ട്. കൊലപാതകത്തിന് മുമ്പ് ഇരുവരും തമ്മിൽ നടന്ന വെല്ലുവിളികളുടെയും തർക്കങ്ങളുടെയും ദൃശ്യങ്ങൾ സമൂഹമാധ്യമങ്ങളിൽ പ്രചരിക്കുന്നതായും റിപ്പോർട്ടുകളുണ്ട്.
മലയാളി പ്രവാസിസമൂഹത്തെ ഞെട്ടിച്ച സംഭവത്തിൽ കൂടുതൽ വിവരങ്ങൾക്കായി പൊലീസ് അന്വേഷണം തുടരുകയാണ്.
