കൊച്ചി ഓഫിസില് എട്ടു മണിക്കൂറോളമാണ് എൻഫോഴ്സ്മെന്റ് ഡയറക്ടറേറ്റിന്റെ (ഇ.ഡി) ചോദ്യം ചെയ്യല് നീണ്ടത്. രാവിലെ പത്തോടെയാണ് അവർ ഓഫിസിലെത്തിയത്.
പുറത്തിറങ്ങിയ വീണ മാധ്യമങ്ങളുടെ ചോദ്യങ്ങളോട് പ്രതികരിച്ചില്ല.
ആവശ്യമെങ്കില് വീണയെ ഇ.ഡി വീണ്ടും വിളിപ്പിക്കും. സി.എം.ആർ.എല്-എക്സാലോജിക് കേസില് കരിമണല് കമ്പനിയുടെ ജോയിന്റ് മാനേജിങ് ഡയറക്ടർ ശരണ് എസ്. കർത്ത, മാനേജിങ് ഡയറക്ടർ എസ്.എൻ. ശശിധരൻ, കർത്തയുടെ ഭാര്യയും സി.എം.ആർ.എല്, എംപവർ ഇന്ത്യ ക്യാപ്പിറ്റല് ഇൻവെസ്റ്റ്മെന്റ്സ് എന്നിവയുടെ ഡയറക്ടറുമായ ജയ എസ്. കർത്ത എന്നിവരെ ഇ.ഡി ഇന്നലെ ചോദ്യം ചെയ്തിരുന്നു.
ടി. വീണയുടെ ഉടമസ്ഥതയിലുള്ള ഐ.ടി കമ്പനിയായ എക്സാലോജിക് സൊല്യൂഷൻസിന് (Exalogic Solutions) സ്വകാര്യ കരിമണല് കമ്പനിയായ സി.എം.ആർ.എല്ലിന് വഴിവിട്ട രീതിയില് പണം നല്കി എന്നതാണ് കേസിന്റെ ആധാരം.
2017 നും 2020 നും ഇടയില് വീണാ വിജയനും അവരുടെ കമ്പനിക്കും സി.എം.ആർ.എല് 1.72 കോടി രൂപ നല്കിയതായി ആദായനികുതി വകുപ്പിന്റെ തർക്കപരിഹാര ബോർഡ് കണ്ടെത്തുകയായിരുന്നു.
എക്സാലോജിക് കമ്പനി സി.എം.ആർ.എല്ലിന് യാതൊരുവിധ സോഫ്റ്റ്വെയർ അല്ലെങ്കില് കണ്സള്ട്ടൻസി സേവനങ്ങളും നല്കിയിട്ടില്ലെന്നും, എന്നാല് ബാങ്ക് അക്കൗണ്ടുകള് വഴി കൃത്യമായി പണം കൈമാറിയിട്ടുണ്ടെന്നും അന്വേഷണ ഏജൻസികള് കണ്ടെത്തി. ഈ തുക കള്ളപ്പണനിരോധന നിയമപ്രകാരം 'കുറ്റകൃത്യത്തിലൂടെ സമ്പാദിച്ച പണ'ത്തിന്റെ പരിധിയില് വരുമെന്നാണ് ഇ.ഡിയുടെ വാദം.
ഈമാസം 12ന് കൊച്ചി ഓഫിസില് ചോദ്യംചെയ്യലിന് ഹാജരാകാൻ ഇ.ഡി വീണക്കു നോട്ടിസ് അയച്ചിരുന്നു. ആരോഗ്യപ്രശ്നങ്ങള് അറിയിച്ചതിനെ തുടർന്നാണ് ഇന്ന് ഹാജരാകാൻ നിർദേശിച്ചത്. ശക്തമായ സുരക്ഷയാണ് ഇ.ഡി ഓഫിസില് ഒരുക്കിയിരുന്നത്.
