കടുത്ത സാമ്പത്തിക പ്രതിസന്ധികൾക്കിടയിലും 'പുതുയുഗ കേരളം' ലക്ഷ്യമിട്ടുള്ള ബജറ്റിൽ, കോട്ടയം ജില്ലക്ക് നേരിട്ടുള്ള വലിയ പദ്ധതി പ്രഖ്യാപനങ്ങളില്ല.
കഴിഞ്ഞ 10 വർഷമായി വിമർശനങ്ങൾക്ക് വിധേയമായി റൗണ്ടാന ജംഗ്ഷനിൽ പാതി വഴി നിർമ്മാണം നിലച്ചിരുന്ന ആകാശപാതയുടെ നിർമ്മാണം പൂർത്തിയാകുമെന്ന പ്രഖ്യാപനം ആശ്വാസകരമായി.
കാർഷിക മേഖലയിലെ പ്രഖ്യാപനങ്ങൾ കോട്ടയത്തിന് വലിയ ആശ്വാസം നൽകുന്നതാണ്.
കോട്ടയം ജില്ലയുടെ സാമ്പത്തിക അടിത്തറയായ റബർ കൃഷിക്ക് ബജറ്റിൽ വലിയ മുൻഗണന ലഭിച്ചിട്ടുണ്ട്.
റബറിന്റെ താങ്ങുവില (MSP) 200 രൂപയിൽ നിന്നും 250 രൂപയായി ഉയർത്തി.
ജില്ലയിലെ ഭൂരിഭാഗം വരുന്ന മധ്യവർഗ, ചെറുകിട റബർ കർഷകർക്ക് വലിയ ആശ്വാസം നൽകുന്ന പ്രഖ്യാപനമാണിത്. കാർഷിക മേഖലയ്ക്കായി ആകെ 1,535 കോടി രൂപയാണ് വകയിരുത്തിയിരിക്കുന്നത്.
തീർത്ഥാടന ടൂറിസത്തെ ആഗോള നിലവാരത്തിലേക്ക് ഉയർത്തുന്നതിന്റെ ഭാഗമായി ശബരിലമ ക്ഷേത്രത്തെ 'തിരുപ്പതി മോഡലിൽ' വികസിപ്പിക്കുമെന്ന് ബജറ്റിൽ പ്രഖ്യാപിച്ചിട്ടുണ്ട്. ശബരിലമയുടെ പ്രധാന ഇടത്താവളമായ കോട്ടയം ജില്ലയിലെ എരുമേലി ഉൾപ്പെടെയുള്ള പ്രദേശങ്ങളിലെ ഇൻഫ്രാസ്ട്രക്ചർ വികസനത്തിനും തീർത്ഥാടക സൗകര്യങ്ങൾക്കും ഇത് വൻതോതിൽ ഗുണം ചെയ്യും.
കോട്ടയം ജില്ലയെ മാത്രം കേന്ദ്രീകരിച്ച് വലിയ അടിസ്ഥാന സൗകര്യ വികസന പദ്ധതികളോ പുതിയ വലിയ സ്ഥാപനങ്ങളോ (ഉദാഹരണത്തിന് മലപ്പുറത്തെ കാൻസർ സെന്റർ, ഹരിപ്പാട് മെഡിക്കൽ കോളേജ്, കൊച്ചിയിലെ ഗ്ലോബൽ ഫർണിച്ചർ ഹബ് എന്നിവ പോലെ) ഈ ബജറ്റിൽ പ്രഖ്യാപിച്ചിട്ടില്ല എന്നത് ഒരു പോരായ്മയായി ചൂണ്ടിക്കാണിക്കപ്പെടുന്നുണ്ട്.
കോട്ടയം ജില്ലയ്ക്കായി മാത്രമുള്ള വലിയ തനത് പദ്ധതികളുടെ കുറവ് പ്രസംഗത്തിൽ പ്രകടമാണെങ്കിലും, ജില്ലയിലെ ഭൂരിപക്ഷം ജനങ്ങളെയും ബാധിക്കുന്ന റബർ വില വർദ്ധനവ്, തീർത്ഥാടക ടൂറിസം പദ്ധതികൾ എന്നിവയിലൂടെ കോട്ടയത്തിന് ബജറ്റിൽ നിർണായകമായ പരിഗണന ലഭിച്ചിട്ടുണ്ട് .വലിയ പ്രഖ്യാപനങ്ങളേക്കാൾ പ്രായോഗികമായ കർഷക പിന്തുണയ്ക്കാണ് ബജറ്റ് ഊന്നൽ നൽകിയിരിക്കുന്നത്.
